Qəzzada HƏMAS qruplaşması ilə 7 aydır davam edən müharibə nəticəsində İsrail iqtisadiyyatı gücünü itirir.

İqtisadiyyat.az xəbər verir ki, bu barədə İsrail Bankının məlumatında deyilir.

Məlumata görə, davam edən müharibə İsrail iqtisadiyyatına böyük zərbə vurub.

Mərkəzi Bankın son hesabatı göstərir ki, müharibə İsrail iqtisadiyyatına təxminən 67 milyard dollar ziyan vuracaq ki, bu da İsrail tarixində ən yüksək xərc olacaq. Şimalda gərginliyin artmasının bu rəqəmi iki dəfə artıracağı gözlənilir.

Eyni zamanda, İsrailin itkilərinə ehtiyat əsgərlərin çağırılması və bunun nəticəsində işçi qüvvəsinin itirilməsi də daxildir.

Belə ki, noyabr və yanvar ayları arasında pik dövrdə ehtiyatda olan əsgərlərin çağırılmasının dəyəri gündə təxminən 600 milyon şekel olub.

Hesabata görə, Qəzza sərhədi yaxınlığındakı İsrail yaşayış məntəqələrinə dəyən zərər 4,1-5,5 milyard dollardır.

Müharibə əmək bazarına da böyük zərbə vurub. Belə ki, İsrail əksəriyyəti tikinti, turizm, kənd təsərrüfatı və xidmət kimi mühüm sektorlarda çalışan 178 mindən çox fələstinli işçisini itirib.

Kredit reytinq agentliyi “Moody's” fevral ayında İsrail hökumətinin xarici və yerli valyutada kredit reytinqini “A1”dən “A2”yə endirib.

Reytinqin aşağı salınması o deməkdir ki, investorlar daha ehtiyatlı ola bilər.

“Fitch” reytinq agentliyinin hesabatında müharibə ilə bağlı geosiyasi risklərin hələ də yüksək olduğu qeyd olunub.

“Fitch”, ölkənin dövlət borcunun ümumi daxili məhsula (ÜDM) nisbətinin bu il 65,7 faizə, gələn il isə 67 faizə yüksələcəyini gözləyir.

İsrail Statistika idarəsinin məlumatına görə, ötən ilin dördüncü rübündə iqtisadiyyatın kiçilməsinə Qəzza müharibəsi birbaşa təsir göstərib. Çünki ehtiyatda olan əsgərlərin hərbi xidmətə çağırılması, israillilərə ayrılan alternativ mənzil xərcləri, tikinti sənayesində işçi qüvvəsi çatışmazlığı ümumi daxili məhsulun tərkibini dəyişib.

Gözəl Həşimova