İraq və Türkiyə suvarma sistemlərinin modernləşdirilməsi üçün 10 il müddətinə yeni strateji saziş imzalayıb. 

İqtisadiyyat.az xəbər verir ki, bu barədə İraqın baş naziri Məhəmməd əl-Sudani Bağdadda Türkiyə prezidenti Rəcəb Tayyib Ərdoğanla birgə mətbuat konfransı zamanı bildirib.

"Bu gün biz 10 il müddətinə suvarma sistemlərinin modernləşdirilməsinə dair saziş imzaladıq, bunun nəticələri İraqa düşən suyun səviyyəsinin artmasına birbaşa təsir edəcək", - əl-Sudani vurğulayıb. 

İraqın baş nazirinin dəftərxanasının yaydığı bəyanatda deyilir ki, tərəflər Dəclə və Fərat çaylarının su ehtiyatlarının idarə olunması üçün birgə layihələrdə əməkdaşlıq etməyi, o cümlədən türk şirkətlərini İraq üçün infrastrukturun inkişafı sahəsində iraqlı həmkarları ilə əməkdaşlığa cəlb etməyi öhdələrinə götürürlər.

 Bundan başqa, sənəd türkiyəli və iraqlı mütəxəssislər arasında təcrübə mübadiləsini nəzərdə tutur və onun qüvvədə olma müddəti tərəflərin razılığı ilə avtomatik olaraq bir il uzadıla bilər.