Türkiyə və İran elektrik enerjisi mübadiləsi barədə razılığa gəliblər.

Bu barədə İqtisadiyyat.az İran mediasına istinadən xəbər verir.

Qeyd edilir ki, İranda səfərdə olan Türkiyənin energetika və təbii sərvətlər naziri Alparslan Bayraktar ilə bu ölkənin energetika naziri Əli Əkbər Mehrabian arasında görüş olub.

Görüşdə iranlı nazir ölkəsinin Türkiyə ilə elektrik enerjisi mübadiləsini mümkün qədər tez inkişaf etdirməyə hazır olduğunu bildirib və danışıqların işə salınması prosesinin ən qısa zamanda reallaşacağına ümid etdiyini söyləyib.

O, Türkiyənin hazırda regionda elektrik enerjisinin əsas istehlakçılarından biri olduğunu vurğulayıb. İranlı nazir Türkiyənin enerjini Avropaya ötürmək imkanı olduğundan iki ölkə arasında enerji mübadiləsi sahəsini inkişaf etdirməyin zəruriliyini bildirib.

Türkiyənin energetika naziri deyib ki, İran və Türkiyənin elektrik sənayesində müsbət irəliləyişlər mövcuddur və bu istiqamətdə ikitərəfli əməkdaşlığın artırılması potensialı yüksəkdir.

O, İranla elektrik enerjisi mübadiləsi və bu sahədə əməkdaşlığın inkişafı üçün danışıqların davam etdiriləcəyini vurğulayıb.

Türkiyəli nazir qeyd edib ki, ölkəsi elektrik enerjisi mübadiləsi məsələsi ilə yanaşı, bərpa olunan enerji mübadiləsi sahəsində də İranla əməkdaşlığa hazırdır.