“Bank Melli İran”nın Bakı Filialı Azərbaycan Mərkəzi Bankın (AMB) qadağalarının təsirini hiss etməyə başlayıb. 

İqtisadiyyat.az maliyyə hesabatına istinadən xəbər verir ki, Filial 2024-cü ilin birinci rübünü 2,49 milyon manat xalis mənfəətlə başa vurub.

Bu da ötən ilin eyni dövrünə nisbətən 4 dəfə çoxdur. Bu isə əsasən, Mərkəzi Bankın tələbi ilə Filialın kredit verilişini dayandırması ilə bağlıdır.

Belə ki, ötən ildən etibarən “Bank Melli İran” kredit verilişini dayandırdığı üçün aktivlər üzrə ehtiyat ayırmalardan 1,78 milyon manat vəsaiti geri çəkib. Bu isə 2023-cü ilin eyni dövrünə nisbətən 12,7 dəfə çoxdur. Başqa sözlə, bu amil Filialın xalis mənfəətinin kəskin artmasına təsir edib.

Qadağanın digər bir təsiri isə “Bank Melli İran”ın Bakı Filialının kiçilməkdə davam etməsidir. Belə ki, bu il aprelin 1-nə Filialın cəmi aktivləri 5,8% və ya 6,9 milyon manat azalaraq 114,8 milyon manata enib. Həmçinin, kredit portfeli 21,4% (875 min manat) azalaraq 3,2 milyon manat təşkil edib.

Ötən ilin sonunda bu rəqəm 4,1 milyon manat təşkil edib. Bundan əlavə, İran bankı son üç ayda qiymətli kağızlara investisiyaları 9,8 milyon manat azaldaraq 25,3 milyon manata endirib. Bankın öhdəlikləri isə ilin əvvəlinə nisbətən 9,4 milyon manat və ya 11,7% azalaraq 71,18 milyon manata enib. Filialın cəmi kapitalı isə bu dövrdə 6% artaraq 43,6 milyon manat təşkil edib.

Xatırladaq ki, AMB ötən ilin may ayında İran Milli Bankının Bakı filialının fəaliyyətini məhdudlaşdırıb. Tənzimləyici qurum kredit təşkilatına məktub göndərib və hesabdan pul götürmək istisna olmaqla bütün bank əməliyyatlarının (depozit qəbulu, kredit verilməsi və s.) dayandırılmasını tələb edib. 

Həmin ərəfədə AMB sədri Taleh Kazımov Mərkəzi Bankın faiz dəhlizinin parametrlərinin müəyyən edilməsi ilə bağlı keçirdiyi mətbuat konfransında Filialda çirkli pulların yuyulması ilə bağlı yoxlamalar aparıldığını və bəzi nöqsanların aşkarlandığını söyləyib. Buna görə də məhdudlaşdırıcı qərar verildiyini vurğulayıb.

Qeyd edək ki, İran Milli Bankının Bakı filialı 1993-cü ildən fəaliyyət göstərir. Onun nizamnamə kapitalı 73,611 milyon manatdır.