"İran Avropa İttifaqı (Aİ) ilə münasibətlərin qarşılıqlı hörmət əsasında inkişafını alqışlayır. Problemləri həll etmək və Avropa ölkələrinin yanlış siyasətlərini düzəltmək üçün dialoq lazımdır". 

İqtisadiyyat.az xəbər verir ki, bu barədə İranın xarici işlər naziri Abbas Əraqçi Avropa İttifaqının xarici siyasət idarəsinin rəhbəri Cozep Borrell ilə telefon danışığında bildirib.

Söhbət zamanı avropalı siyasətçi Əraqçini İranın yeni xarici işlər naziri təyin olunması münasibətilə təbrik edib.

O, İran və Avropa İttifaqı arasında siyasi dialoq və məsləhətləşmələrin Prezident Məsud Pezeşkianın yeni administrasiyası dövründə davam edəcəyinə və genişlənəcəyinə ümid etdiyini bildirib.

Tərəflər həmçinin onları maraqlandıran bir sıra mövzular, o cümlədən sanksiyaların ləğvi ilə bağlı danışıqlar və İsrail rejiminin Qəzza zolağında apardığı əməliyyatlar ilə bağlı son hadisələr ətrafında fikir mübadiləsi aparıblar.