İqtisadiyyat.az xəbər verir ki, bu barədə məlumatı Dövlət Vergi Xidmətinin Vergi siyasəti baş idarəsinin rəisi Nicat İmanov ölkənin aparıcı maliyyə və biznes platformalarından biri olan “Vergi və Mühasibatlıq Zirvəsi 2025”də (VMZ2025) səsləndirib.

Onun sözlərinə görə, ümumilikdə ödəyicilərin sayı 2019-cu illə müqayisədə 1,9 dəfə, əlavə dəyər vergisi ödəyicilərinin sayı isə 3 dəfə artıb:

“Bu məsələ sahibkarlığın inkişaf və şəffaflaşması ilə bağlı bizim iqtisadiyyatına verə biləcəyimiz əsas töhfələrdən biri olub. Əlbəttə, kölgə iqtisadiyyatının daraldılması və vergi siyasətindəki yanaşmalar bəzən biznes tərəfindən birmənalı qarşılanmır. Bu da təbiidir, çünki biznesin öz baxış bucağı, dövlət öz fəaliyyətini daha geniş çərçivədə düşünmək məcburiyyətindədir. Geniş mənada məşğulluğun təmin olunması, əmək müqavilələrinin leqallaşması, iqtisadiyyatın inkişafı, aktiv ödəyicilərinin sayının artması kimi hədəflərimiz mövcuddur. Vergi sistemi iqtisadi inkişaf strategiyasının bir parçası olaraq biznesin inkişafını sosial iqtisadi model bazasında dəstəkləyir və öz hədəflərini qısa müddətdə gəlirlərin əldə edilməsinə deyil, daha uzunmüddətli nəticələrə nail olunmasında görür. İstər vergi siyasətinin həyata keçirilməsi, istər tənzimləmələrə və təşviqlərə söykənən yanaşmaların kökündə məhz bu amil durur. Bu isə dövlət və özəl sektor arasında dialoqun nə qədər mühüm olduğunu bir daha ortaya çıxarır. İqtisadi inkişafın açarı məhz dövlət və özəl tərəfdaşlığındadır”.

İsmayıl Bakuvi