Payız ayları başlayan kimi “Apple” məhsullarının yeni versiyalarının təqdimatı artıq bir ənənəyə çevrilib. Bu il də gözlənti davam edir. Sentyabr və oktyabr aylarında yeni iPhone seriyasının, ağıllı saat və kompyuter modellərinin təqdim ediləcəyi gözlənilir.

İqtisadiyyat.az xəbər verir ki, artıq tarix də məlumdur. Mediaya sızan informasiyaya görə, "Apple" iPhone 15, Plus, Pro və Pro Max modellərinin daxil olduğu yeni smartfon seriyasını sentyabrın 12-də təqdim edəcək.

Yeni seriyada "Pro Max" adı "Ultra" ilə əvəz oluna bilər. İnsayderlər bu ideyanı uzun müddətdir dilə gətirirlər. Təsdiq olunub-olunmayacağını zaman göstərəcək. 

Yeni məhsulların yaddaşı da gündəmdədir. Xarici media yazır ki, “iPhone 15 Pro” və “15 Pro Max” (və ya "Ultra") modelləri 256 və 512 giqabayt, həmçinin 1 və 2 terabaytlıq versiyalarda da buraxılacaq. 15 Pro və Pro Max seriyasında 128 giqabayt yaddaşa yer verilməyəcəyi deyilir.

iPhone 15 seriyasının rənglərinə gəldikdə, insayderlər iPhone 15 Pro modellərində qızılı və tünd bənövşəyi rənglərin olmayacağını bildirir. iPhone 15 Pro və 15 Pro Max yeni boz rəngdə buraxıla bilər. Bu "titan boz" rəngi hesab edilir. iPhone 14 Pro-dan alıcılara tanış olan tünd bənövşəyi rəng isə 15 seriyasında tünd mavi ilə əvəz olunacaq. 

“iPhone 15” və “iPhone 15 Plus" üçün gözlənilən rəng seçimləri qara, yaşıl, mavi, sarı və çəhrayıdır.

Digər qeyd edilməli məqam iPhone 15 seriyasına daxil olacaq bütün modellərin ekranları üzərində Dynamic Island çıxıntısının reallaşdırılacağı ilə bağlıdır. Bununla yanaşı, iPhone 15 ilə iPhone 15 Plus-ın ekranları iPhone 15 Pro modellərinin ekranlarından fərqlənəcəklər.

iPhone 14 modelləri ilə müqayisədə iPhone 15 modellərində batareya həcmlərinin 12-14% yüksək olacağı da gözlənilən yeniliklər sırasındadır.

Qiymətlərə gəldikdə, iPhone 15 Pro və Pro Max modellərinin qiymətinin 1099 dollardan başlayacağı güman edilir. Amma hər şey tam dəqiqliyi ilə təqdimatdan sonra məlum olacaq.