İnsan beyninin ölçüsü tədricən böyüyür və bu, gənc nəsillərdə demans riskini azalda bilər.

İqtisadiyyat.az dünya mediasına istinadən xəbər verir ki, bununla bağlı yaşı 55-65 arasında olan üç mindən çox amerikalının beyninin təsviri ilə aparılan araşdırmada deyilir.

Tədqiqatlar göstərir ki, 1970-ci illərdə doğulanların ümumi beyin həcmi 1930-cu illərdə doğulanlara nisbətən 6,6% daha böyükdür. Bu, boy, yaş və cins kimi digər amillər nəzərə alındıqdan sonra qeydə alınıb.

Bildirilib ki, genetika beyin ölçüsünün müəyyən edilməsində mühüm rol oynayır, lakin əldə edilən nəticələr göstərir ki, sağlamlıq, sosial, mədəni və təhsil faktorları kimi xarici təsirlər də burda rol oynaya bilər.

Qeyd edilib ki, hazırda demans bütün dünyada on milyonlarla insana təsir edir və dünya əhalisinin qocalması ilə yaxın üç onillikdə bu xəstəliyin diaqnozu üç dəfə artacaq.

 

Gözəl Həşimova