“SpaceX” və “Tesla” şirkətlərinin rəhbəri, “xAI” startapının yaradıcısı İlon Mask elektriklə işləyən avtomobillərin birgə istehsalı zavodunun tikintisini və onların Hindistan avtomobil bazarına tədarükünü müzakirə etmək üçün bu ay Hindistana səfər edəcək.

İqtisadiyyat.az xəbər verir ki, bu barədə “The Economic Times” mənbələrə istinadən məlumat yayıb.

“Musk aprelin 22-də Nyu-Dehlidə Hindistanın baş naziri Narendra Modi ilə görüşərək investisiya planlarını, “Tesla”nın Hindistanda elektromobil istehsalı zavodu tikmək niyyətini və digər əməkdaşlıq məsələlərini müzakirə edəcək”, - deyə mənbələr bildiriblər.

Yerli medianın məlumatına görə, şirkətin investisiyası təxminən 2 milyard dollar təşkil edə bilər.

Qeyd edək ki, ötən ilin yayında “Tesla” Hindistan hökumətinə avtomobillərinin istehsalını ölkədə yerləşdirmək üçün investisiya təklifi göndərib və bu təklif ölkənin Ticarət və Sənaye Nazirliyi ilə müzakirə edilib. Təklif ildə 500 min elektromobil istehsal edəcək müəssisənin tikintisini, istehsalın lokallaşdırılmasını və məhsulların üçüncü ölkələrə ixracını nəzərdə tutur. İstehsal olunan modellərin minimum dəyəri təxminən 25 min dollar təşkil edəcək. Amerikalı avtomobil istehsalçısı xərcləri azaltmaq üçün Hindistanda akkumulyator istehsal etmək niyyətində olduğunu da bildirib. 

Sadiq Cavadov