Ölkələr Birləşmiş Millətlər Təşkilatının (BMT) keçən ilki COP28 iqlim sammitində razılaşdırılmış 2030-cu il iqlim və təmiz enerjiyə keçid hədəflərini tam şəkildə həyata keçirməklə qlobal enerji sektorunu dəyişdirə bilər.
İqtisadiyyat.az xəbər verir ki, bu barədə Beynəlxalq Enerji Agentliyinin (IEA) hesabatında deyilir.
Məlumata görə, COP28-də 200-ə yaxın ölkə qlobal enerji hədəflərinə nail olmaq üçün işləməyə söz verib.
Ölkələrin öhdəlikləri isə bunlardır:
- 2050-ci ilə qədər qlobal enerji sektoru üçün xalis sıfır emissiyaya nail olmaq
- Qalıq yanacaqlardan uzaqlaşmaq
- Bərpa olunan enerji potensialını üç dəfə artırmaq
- Enerji səmərəliliyi üzrə irəliləyiş tempini 2030-cu ilə qədər iki dəfə artırmaq
- Aşağı emissiyalı texnologiyaların tətbiqini sürətləndirmək
Hesabata görə, qlobal bərpa olunan enerji potensialının üç dəfə artırılması hədəfi əlverişli iqtisadi şərait və güclü siyasətlər sayəsində əldə edilə bilər.
Bundan əlavə, 2030-cu ilə qədər dünyada 1500 giqavat enerji saxlama gücünə ehtiyac olacaq.
Bərpa olunan enerji və səmərəlilik hədəfləri tam yerinə yetirilərsə, 2030-cu ilə qədər qlobal emissiyalar 10 milyard ton azala bilər və bu, Paris Sazişində müəyyən edilmiş temperatur artımının 1,5 dərəcə ilə məhdudlaşdırılması məqsədinə nail olmağa kömək edə bilər.
Beləliklə, COP28-də 2030 hədəfləri tam yerinə yetirilərsə, ölkələr qlobal enerji sektorunu transformasiya edə bilərlər.
Gözəl Həşimova