ABŞ Mərkəzi Komandanlığının (CENTCOM) rəhbəri general Maykl Kurilla avqustun 3-də ABŞ və müttəfiqlərinin İranın İsrailə qarşı mümkün hücumuna hazırlaşdığı bir vaxtda Yaxın Şərq regionuna səfər edib.

İqtisadiyyat.az xəbər verir ki, bu barədə "Axios" portalı mənbələrinə istinadən məlumat yayıb.

Məlumata görə, CENTCOM rəhbəri Fars körfəzinin bir sıra ölkələrinə, İordaniyaya və İsrailə səfər edəcək və İranın mümkün zərbəsini birgə dəf etmək üçün beynəlxalq və regional müttəfiqləri səfərbər etməyə çalışacaq. 

"Axios" qeyd edir ki, Amerika və İsrail tərəfləri İran və Hizbullah hərəkatının əməliyyatı birgə həyata keçirməyə qərar verib-verməyəcəyini bilmirlər. Mənbələr hücumun bazar ertəsi gözlənildiyini bildirib.

Portal yazır ki, ABŞ Müdafiə Nazirliyi və Mərkəzi Komandanlıq hələlik şərh verməyib.