Hüquqşünas Ramil Süleymanov İqtisadiyyat.az-a dəyişikliyin vətəndaşlar üçün əhəmiyyəti barədə danışıb. 

O qeyd edib ki, qanunvericiliyə olunmuş bu dəyişiklik vətəndaşlar üçün olduqca əhəmiyyətlidir. 

Bu dəyişikliyə zərurətin yaranma səbəblərinə toxunan hüquqşünas deyir ki, bəzi hallarda vətəndaşların icra məmurları ilə qeyri-prosessual münasibətlərə girdiklərinə rast gəlinirdi: 

“Məsələn, müəyyən icra işlərində gecikmələr olduğu halda, eyni zamanda tələbkarların hüquqlarının pozulması halları müşahidə olunduqda, vətəndaş məcbur olurdu ki, hüquq-mühafizə orqanlarına müraciət etsin və hüquq-mühafizə orqanları tərəfindən aparılan araşdırma nəticəsində məlum olurdu ki, borclu icra məmuru ilə qeyri-prosessual münasibətə girib və nəticədə tələbkarın hüquqları pozulub. Eyni zamanda bu düzəlişə qədər, icra məmurlarına icazə verilirdi ki, müvafiq qəbz əsasında vətəndaş tərəfindən, yəni borclu tərəfindən ödənilən pulu birbaşa qəbul edib onu borcluya təhvil-təslim eləsin”.

Hüquqşünas bildirib ki, amma bu düzəlişdən sonra artıq borclular icra məmuruna birbaşa əlaqəyə keçməklə pulu təqdim edə bilməyəcəklər və hər hansı bir ödəniş təqdim edə bilməyəcəklər:

“Nəticə etibarilə, onlar tərəfindən ödənilən pul təqdim olunmuş müvafiq rekvizitlər əsasında birbaşa icra  məmurunun və icra şöbəsinin hesabına otuzdurulacaqdır, ondan sonra borclunun hesabına göndəriləcək. Bu kifayət qədər doğru bir düzəlişdir və mən hesab edirəm ki, bu düzəlişdən sonra artıq qeyri-prosessual davranışlar yığışdırılmış olacaq”.

Qeyd edək ki, bununla əlaqədar İnzibati Xətalar Məcəlləsinə təklif olunan yeni - 528-2-ci maddəyə əsasən, icra sənədləri üzrə ödənilməli olan pul vəsaitlərinin, icra ödənişlərinin, habelə icra hərəkətlərinin həyata keçirilməsi ilə bağlı xərclərin icra məmuru tərəfindən nağd qaydada qəbul edilməsinə, yaxud tələbkara və ya borcluya ödənilməli olan pul vəsaitlərinin ödənilməsinin icra məmuru tərəfindən nağd qaydada həyata keçirilməsinə görə vəzifəli şəxslər beş yüz manatdan min manatadək məbləğdə cərimə ediləcək.