Hindistanın Kerala ştatında torpaq sürüşməsi nəticəsində azı 54 nəfər ölüb.
İqtisadiyyat.az xəbər verir ki, bu barədə yerli “Asianet” informasiya portalı məlumat yayıb.
Nəşrin məlumatına görə, iyulun 30-na keçən gecə uzun sürən musson yağışlarından sonra ştatın şimal-şərqindəki Vayanad bölgəsində dörd saat ərzində üç sürüşmə baş verib. İndiyədək 250 nəfər xilas edilib və təhlükəsiz ərazilərdə müvəqqəti düşərgələrdə yerləşdirilir. Bununla belə, onlarla insan itkin düşüb.
Hindistanın Baş naziri Narendra Modi həlak olanların ailələrinə başsağlığı verib və pul təzminatı veriləcəyini açıqlayıb. Onun sözlərinə görə, sürüşmə qurbanlarının yaxınlarına hakimiyyət orqanlarından 200 min hind rupisi (təxminən 2,4 min dollar), yaralılara isə 50 min hind rupisi (təxminən 600 dollar) veriləcək.
