Ötən ay Hindistan 10,06 milyard dollar dəyərində qızıl idxal edib.
İqtisadiyyat.az xəbər verir ki, bu barədə Hindistanın Ticarət və Sənaye Nazirliyinin məlumatında deyilir.
Bildirilib ki, bu göstərici rekord səviyyə hesab olunur. Hindistanın qızıl idxalı ötən ilin avqust ayı ilə müqayisədə 2 dəfə, bu ilin iyul ayı ilə müqayisədə isə 3 dəfə çoxdur.
Qızıl idxalının artmasına səbəb rüsumların azaldılması və qızılın dünya üzrə qiymətinin bahalaşmasıdır.
Qeyd edilib ki, iyul ayında Hindistanda qızıla idxal rüsumları kəskin şəkildə azalıb - 15%-dən 6%-ə. Analitiklər belə tədbirlərin qızıla tələbi artıracağını proqnozlaşdırırlar.
Gözəl Həşimova
