Cari maliyyə ilinin ilk yarısının (aprel-sentyabr) nəticələrinə görə, Rusiya Hindistana neft tədarükündə əsas təchizatçı olaraq qalıb və ümumi tədarük həcminin 39%-ni təşkil edib.

İqtisadiyyat.az xəbər verir ki, bu barədə "The Economic Times" qəzeti yazıb. 

Nəşrin yazdığına əsasən, Rusiyaya bu statusu qorumağa neftə tətbiq etdiyi cəlbedici endirimlər kömək edib.

Əsas tədarükçülər sırasında ilk üçlükdə İraq və Səudiyyə Ərəbistanı da yer alıb. Onların Hindistan neft idxalındakı payı müvafiq olaraq 18% və 13% təşkil edir. Birləşmiş Ərəb Əmirlikləri (8%) və ABŞ (5,5%) bu siyahıda növbəti yerləri tuturlar.

Son dörd həftə ərzində Rusiya neft ixracını kəskin artırıb. İxracat iyunun sonlarından bəri maksimum səviyyəyə çataraq gündə 3,47 milyon barelə yüksəlib. Tədarükün əsas həcmi Asiya ölkələrinə yönəlib. Rusiya neftinin dəniz yolu ilə ixracının təxminən 95 %-i bu regiona aiddir.