Cammu və Kəşmir ittifaqı ərazisində baş vermiş terror aktı ilə əlaqədar Hindistan hakimiyyəti aprelin 27-dən etibarən Pakistan vətəndaşlarına verilən bütün vizaları etibarsız hesab edəcək.

İqtisadiyyat.az bu barədə "İnterfakc"a istinadən xəbər verir.

Beləliklə, pakistanlılar aprelin 27-dək Hindistan ərazisini tərk etməlidirlər. Tibbi vizalar isə aprelin 29-dək etibarlı olacaq.

Bundan əlavə, Hindistan, vətəndaşlarına Pakistana səfər etməmək barədə ciddi xəbərdarlıq edir. Hazırda oradakı Hindistan vətəndaşlarına səlahiyyətlilər tərəfindən ən qısa zamanda evlərinə qayıtmaları tövsiyə olunur.

Məlumata görə, Hindistan xarici işlər nazirinin müavini Vikram Misri bildirib ki, Hindistan Pakistandakı missiyasından hərbi attaşeləri geri çağıracaq və İslamabaddakı diplomatik missiyanın işçilərini 55 nəfərdən 30 nəfərə endirəcək.

Pakistanın Dehlidəki missiyasındakı bütün hərbi attaşelər persona non-qrata elan edilib. Onların Hindistanı tərk etmək üçün bir həftə vaxtı var.

Hindistan Pakistana qarşı bir sıra tədbirlər də elan edib. Xüsusilə, ölkə hakimiyyəti iki ölkənin bir sıra çaylardan istifadəsini tənzimləyən Hind Suları Müqaviləsini dayandırmaq qərarına gəlib.

Hindistan hakimiyyəti aprelin 22-də Hindistanın şimalında baş vermiş terror aktı ilə bağlı belə tədbirlər görüb.Hücum turistlərin çoxluq təşkil etdiyi Pahalqam qəsəbəsində baş verib. Bir qrup silahlının insanlara atəş açdığı bildirilir. Hücum nəticəsində 30-a yaxın adam həlak olub.

 

Gözəl Azadəliyeva