Hindistan Cənub-Şərqi Asiya Millətləri Assosiasiyası (ASEAN) ölkələri ilə ikinci dəniz təliminə ev sahibliyi etməyə hazırlaşır.
İqtisadiyyat.az xəbər verir ki, bunu Hindistanın xarici işlər naziri Subrahmanyam Caişankar Hanoyda keçirilən ASEAN Gələcək Forumunun iştirakçılarına müraciətində deyib.
O xatırladıb ki, Hindistan Cənub-Şərqi Asiyada Dostluq və Əməkdaşlıq Müqaviləsinə ilk qoşulanlardan biri olub və bu, Yeni Dehlinin regionda sülh, firavanlıq və sabitliyi qorumaq əzmini nümayiş etdirir: "Biz ilk ASEAN-Hindistan dəniz təlimlərini 2023-cü ildə keçirdik və ikincisini hər iki tərəf üçün əlverişli vaxtda keçirmək niyyətindəyik".
Hindistan və ASEAN arasında dəniz manevrləri 2-8 may 2023-cü il tarixlərində iki mərhələdə baş tutub: Sinqapur sahillərində və Cənubi Çin dənizində. Onlara ASEAN-ın müxtəlif ölkələrindən 9 gəmi, 6 təyyarə və 1,8 mindən çox hərbi qulluqçu cəlb edilib.
Cənub-Şərqi Asiya Ölkələri Assosiasiyası 1967-ci ildə yaradılıb və bu gün regionun 10 ölkəsini birləşdirir: Bruney, Vyetnam, İndoneziya, Kamboca, Laos, Malayziya, Myanma, Sinqapur, Tayland və Filippin. 2024-cü ilin əvvəlindən ASEAN Sədrliyinin səlahiyyətləri rotasiya əsasında İndoneziyadan Laosa verilib.
