Nepal ordusu bu il Himalaydakı Everest, Nuptse və Lhotse dağlarının zirvələrindən 11 ton zibil yığıldığını, 4 cəsəd və 1 skeletin aşkar edildiyini bildirib.

İqtisadiyyat.az bu barədə “The Himalayan Times” qəzetinə istinadən xəbər verir.

Məlumata görə, Himalaydakı bəzi dağların, o cümlədən dünyanın ən hündür dağı Everestin hər il təmizlənməsi işləri aparılıb. 55 gün davam edən təmizlik nəticəsində 11 ton zibilin yığıldığı, 4 cəsəd və bir skeletin çıxarıldığı bildirilib.

Açıqlamada 5 ildə ümumilikdə 119 ton zibilin, 14 meyitin və bir neçə skeletin çıxarıldığı vurğulanıb.

Qeyd edək ki, Everest dağında 50 tondan çox tullantı və 200-dən çox cəsədin olduğu təxmin edilir.

 

Gözəl Həşimova