HƏMAS hərəkatının hərbi qanadı İzzəddin əl-Qəssam Briqadaları İsrail Hərbi Hava Qüvvələrinin endirdiyi zərbə nəticəsində Livanın cənubundakı səhra komandirinin öldüyünü təsdiqləyib.
İqtisadiyyat.az xəbər verir ki, müvafiq bəyanat radikalların rəsmi "Telegram" kanalında dərc olunub.
Bəyanatda deyilir: "Samer Mahmud əl-Hac bu gün, 2024-cü il avqustun 9-da düşmənin pilotsuz təyyarəsinin Livanın cənubunda yerləşən Səidə şəhərinə endirdiyi zərbə nəticəsində qəhrəmancasına həlak olub".
Əl-Hacın ölümünün digər detalları və HƏMAS-ın hərbi qanadının strukturunda hansı vəzifəni tutması barədə məlumat verilmir.
Bundan əvvəl Livanın "Naharnet" xəbər portalı İsrail Hərbi Hava Qüvvələrinə məxsus pilotsuz uçuş aparatının Səidədə avtomobili vurması barədə məlumat yayıb. Avtomobildə olan Əl-Hac öldürülüb, daha bir radikal isə yaralanıb. Portalın məlumatına görə, Əl-Hac Səidə şəhərinin kənarında yerləşən Ayn əl-Hilveh fələstinli qaçqın düşərgəsində İzzəddin əl-Qəssam briqadalarının təhlükəsizlik xidmətinə rəhbərlik edib.
