HƏMAS qruplaşması ilə müharibə İsrail iqtisadiyyatına zərbə vurur.

Bu barədə İqtisadiyyat.az dünya mediasına xəbər verir.

İsrail valyutası

Müharibə İsrailin yerli valyutasının dəyər itirməsinə səbəb olub. Belə ki, İsrail valyutası olan şekel dollar qarşısında son 11 ilin ən aşağı səviyyəsinə enib.

İsrail Bankının oktyabrın 9-da elan etdiyi yerli valyutanın sabitləşməsi üçün 30 milyard dollara qədər satış planına baxmayaraq, şekelin ucuzlaşmasının qarşısını almaq mümkün olmayıb.

Dollar/şekel pariteti oktyabrın 30-da 4-ə yüksəlib. Hesabat dövründə avro/şekel pariteti 4,24-ə yüksəlib.

Turizm sektoru

Oktyabrda İsrailin turizm fəaliyyəti illik bazda 76% azalıb.

İsrail Statistika Bürosunun hesabatına görə, oktyabr ayında İsraili təxminən 89 min 700 turist ziyarət edib. Bu səfərlərin əksəriyyəti oktyabrın ilk həftəsində, yəni müharibə başlamazdan əvvəl həyata keçirilib.

Halbuki, ötən ilin oktyabrında İsrailə 370 min turist gəlib.

Müharibədən əvvəl gündə təxminən 500 uçuşun həyata keçirildiyi “Ben Qurion” hava limanında hücumlardan sonrakı gündə orta hesabla 100 uçuş qeydə alınıb.

Əmək bazarı

İsrail 7 oktyabrdan bəri 950 min işçi qüvvəsini itirib. Məlumata görə, 178 mindən çox fələstinli müharibə başlayandan sonra İsraildəki iş yerlərinə və yaşayış məntəqələrinə qayıda bilməyib.

Bundan əlavə, 350 min israilli işçi iş yerlərini tərk edərək Qəzza zolağındakı qarşıdurmalarda iştirak etmək üçün orduya qatılıb.

Daşınmaz əmlak sektoru

Müharibədən təsirlənən digər sektor İsrailin daşınmaz əmlak sektoru olub.

İsraildə daşınmaz əmlak sektorunda təxminən 178 min fələstinli işçi var idi. Onlardan təxminən 90 mini müharibə başlayandan sonra işə qayıtmayıb.

Buna görə də daşınmaz əmlak sektoru İsrail birjasında 8 % dəyər itirib.

Gözəl Həşimova