İsrailin Qəzzaya hücumları ölkə iqtisadiyyatında durğunluğa, yerli valyutanın devalvasiyasına və birjada geriləməyə səbəb olub.

İqtisadiyyat.az xəbər verir ki, bu barədə Təl-Əvivdəki investisiya şirkəti "Meitav"ın baş iqtisadçısı Aleks Zabejinski bildirib.

Onun sözlərinə görə, İsrailli istehlakçılar qarşıdurmalar səbəbindən qeyri-ərzaq xərclərini əhəmiyyətli dərəcədə məhdudlaşdırıblar. İstehlak xərclərinin azalması isə iqtisadiyyata təsir göstəririr:

"350 min nəfərin Qəzza zolağına və Livan sərhədinə ehtiyat hərbi xidmətə göndərilməsi işçi qüvvəsinə mənfi təsir göstərib. İsrail hökuməti rəsmi təxliyə proqramı çərçivəsində 120 mindən çox israillini təhlükəsiz yerlərə köçürüb.  İsrailin ümumi əhalisi təxminən 10 milyondur. Ölkədəki qarşıdurmalar səbəbindən didərgin düşənlərin sayının 250 min civarında olduğu təxmin edilir.

HƏMAS-la 60 gün davam edəcəyini təxmin etdiyimiz münaqişənin dəyəri 17 milyard dollardan çox olacaq. Bu məbləğə döyüş sursatı və ehtiyatda olan əsgərlərin səfərbər edilməsi, birbaşa döyüş əməliyyatlarının xərcləri, maddi zərərin ödənilməsi, müəssisələrə və ailələrə yardım ödənişləri, işsizlərə kompensasiya daxildir. Bu məbləğ ümumi iqtisadi məhsulun (ÜDM) 3,5%-nə uyğundur.

Digər tərəfdən, İsrail şekeli dollar qarşısında son 11 ilin ən aşağı səviyyəsinə düşüb. Bütün tədbirlərə baxmayaq, şekel şiddətli qarşıdurma fonunda zəifləməyə davam edir".

Gözəl Həşimova