Türkiyənin xarici işlər naziri Hakan Fidan rəsmi səfərdə olduğu Qırğızıstanın paytaxtı Bişkekdə bu ölkənin parlamentin sədri Nurlanbek Şakiyev tərəfindən qəbul edilib.

İqtisadiyyat.az xəbər verir ki, bu barədə Qırğızıstan Parlamenti Rəyasət Heyətinin Mətbuat Mərkəzi məlumat yayıb.

Məlumata görə, Şakiyev və Fidan arasında keçirilən görüşdə ikitərəfli siyasi, iqtisadi və mədəni əlaqələrin artırılması və parlamentlərarası əməkdaşlığın inkişafı müzakirə olunub.

Görüşdə nazir Fidan Türkiyə Böyük Millət Məclisinin sədri Numan Kurtulmuşun salamlarını Şakiyevə çatdırıb: "Əsas məqsədimiz iki qardaş xalq arasında qardaşlıq və dostluğu gücləndirməkdir".

İki ölkə arasında əlaqələrin artırılmasında parlamentlərin roluna diqqət çəkən Fidan bu sahədə göstərdiyi dəstəyə görə Qırğızıstan parlamentinin sədrinə təşəkkür edib.

Fidanın səfərinin iki ölkə arasında əlaqələrin möhkəmlənməsinə töhfə verəcəyini vurğulayan Şakiyev qeyd edib: "Əsas məqsədimiz parlamentlərarası əlaqələri ikitərəfli və beynəlxalq səviyyədə genişləndirməkdir".

Türkiyənin Qırğızıstanın ən böyük ticarət və iqtisadi tərəfdaşlarından biri olduğunu və iki ölkə arasında ticarətin artdığını bildirən Şakiyev əlavə edib: "Bu tempi daha da artırmalı və ticarət həcmini 2 milyard dollara çatdırmalıyıq".
​