Türkiyənin xarici işlər naziri Hakan Fidan Rio-de-Janeyroda keçirilən "İyirmilik Qrupu"nun (G20) nazirlər toplantısında BMT Təhlükəsizlik Şurasının beynəlxalq böhranları həll edə bilməməsi səbəbindən bütün BMT sistemində islahatların aparılması zərurətindən danışıb.

İqtisadiyyat.az xəbər verir ki, bu barədə diplomatik mənbələrə istinadən "TRT Haber" telekanalı məlumat yayıb.

Televiziya şirkətinin məlumatına görə, "Qlobal İdarəetmə İslahatı" sessiyasında çıxış edən türkiyəli nazir qeyd edib ki, BMT Təhlükəsizlik Şurası bir çox məsələlərdə, xüsusən də Qəzzə böhranının həlli istiqamətində addım ata bilmir. 

"Fidan beynəlxalq hüququn parametrlərinə əsaslanan daha demokratik, hesabatlı BMT sisteminə ehtiyac olduğunu vurğuladı", - mənbələr Türkiyə XİN rəhbərinin sözlərini sitat gətirir.

Fidan həmçinin bildirib ki, beynəlxalq maliyyə sistemi daha şəffaf və dayanıqlı olmalı, maliyyə qurumları inkişaf etməkdə olan və yoxsul ölkələrin maraqlarını nəzərə alan siyasət yürütməlidir. Əks halda, onun fikrincə, G20 davamlı inkişaf məqsədinə nail ola bilməyəcək.

Türkiyə hakimiyyəti əvvəllər dəfələrlə BMT sistemində islahatların aparılması zərurətini bəyan edərək, "dünyanın beşdən böyük olduğunu", yəni Birləşmiş Millətlər Təşkilatının Təhlükəsizlik Şurasının beş daimi üzvünü (Rusiya, ABŞ, Çin, Böyük Britaniya və Fransa) qeyd edib.