Gürcüstan Müdafiə Nazirliyinin (MN) 43 əməkdaşı ölkənin Avropa İttifaqına (Aİ) üzvlüklə bağlı danışıqlarının dayandırılmasını açıq şəkildə tənqid edib.

İqtisadiyyat.az xəbər verir ki, bu barədə “Sputnik Gürcüstan” məlumat yayıb.

Məlumata görə, nazirlik əməkdaşları ortaq bəyanat imzalayaraq, qərarın Aİ-yə inteqrasiya prosesinə zərbə vurduğunu bildiriblər. Həmçinin bu addıma etiraz edənlər arasında bir neçə hakim də yer alıb, lakin onların sayı dəqiq açıqlanmayıb.

Qeyd edək ki, 28 noyabr tarixində Gürcüstanın Baş naziri İrakli Kobaxidze ölkəsinin 2028-ci ilə qədər Aİ-yə üzvlüklə bağlı danışıqları gündəmə gətirilməyəcəyini elan edib. O, həmçinin Gürcüstanın Avropa İttifaqının büdcə qrantlarından imtina edəcəyini də bildirib.

Bu bəyanatlardan sonra ölkə daxilində geniş etiraz aksiyaları başlayıb. Tbilisidə parlament binası qarşısında keçirilən aksiyalarla yanaşı, Kutaisi və Batumi şəhərlərində də vətəndaşlar qərara öz narazılıqlarını bildiriblər.