Gürcüstan Parlamentinin Hüquq Məsələləri Komitəsi "Xarici agentlər haqqında" qanun layihəsini birinci oxunuşda dəstəkləyib. 

İqtisadiyyat.az xəbər verir ki, Komitənin iclası qanunverici orqanın saytında canlı yayımlanıb.

Qanun layihəsi üzrə dinləmələr hakim "Gürcü Arzusu - Demokratik Gürcüstan" partiyasının nümayəndələri ilə müxalifət arasında qızğın müzakirələr fonunda baş tutub. Gürcüstan parlamentinin müxalifətdə olan "Vətəndaşlar" partiyasından olan deputatı Aleksandr Elisaşvili parlament çoxluğunun lideri Mamuka Mdinaradze spiker kimi kürsüdə dayanaraq həmkarlarının suallarını cavablandırarkən onunla dava edib. İclasın sədri fasilə elan etməli olub.

Daha sonra hüquq məsələləri üzrə komitənin rəhbəri Anri Oxanaşvili 10-a qədər müxalifətçini "nalayiq davranışlarına" görə iclas zalından çıxarmalı olub. Qanun layihəsinin parlamentin plenar iclasına çıxarılacağı tarix hələlik məlum deyil. 

Eyni zamanda parlamentin qarşısında qanun layihəsinə qarşı mitinq keçirilir. Etirazçılar parlament binasının ətrafında gəzərək simvolik dairə qurmağa çalışırlar. Zaman-zaman hüquq-mühafizə orqanları ilə toqquşmalar yaşanır.