Gürcüstan Parlamentinin Bürosu hüquq komitəsinin aprelin 12-də müzakirə etməyi planlaşdırdığı "xarici agentlər" haqqında qanun layihəsini qeydə alıb.

İqtisadiyyat.az xəbər verir ki, bu barədə Gürcüstanın müstəqil SOVA agentliyi məlumat yayıb.

Məlumata görə, hakim partiya "Gürcü Arzusu" daha əvvəl etiraz dalğasına səbəb olmuş və Qərbin tənqidindən sonra geri götürülən "xarici agentlər" haqqında qanunu yenidən qəbul etməyi planlaşdırır.

Partiya qeyd edir ki, qanun qeyri-hökumət təşkilatlarına və mediaya da şamil ediləcək və "Xarici Təsirdə Şəffaflıq Qanunu" adlanacaq.

Keçən il mübahisəli qanunu irəli sürmək üçün uğursuz ilk cəhddən sonra hakim partiya yenidən qanunun qəbuluna cəhd edir. Baş nazir İrakli Kobaxidze ictimaiyyətin və medianın mənfi reaksiyasına baxmayaraq, bu dəfə hakimiyyətin qanunu təsdiqləyəcəyinə eyham vurub.