"Google" platforması istifadəçilərin işini daha səmərəli etmək məqsədi ilə növbəti yeniliyə imza atıb.

İqtisadiyyat.az xarici mediaya istinadən xəbər verir ki, şirkət süni intellekti Google Meet video çat xidmətinə inteqrasiya edən "Duet AI"-ı təqdim edib. Bu alətin bir sıra özəllikləri var. Məsələn, o, avtomatik olaraq videozəng edənin görünüşünü və səsini təkmilləşdirə bilir. Yəni şəxsin əvəzinə iclasda "iştirak edir". Alət həmçinin danışılanları qeydə alaraq real vaxt rejimində tərcümə edə bilir. Üstəlik bunu 18 dildə "bacarır". Əgər siz video-iclasa gecikmisinizsə, o sizə qoşulduğunuz ana qədərki hissənin xülasəsini təqdim edir. Video-iclasınız bitəndən sonra isə sistem sizə ümumi iclasın qısa icmalını göndərir. Ki, bu da iclasda iştirak edə bilməyən istifadəçilərə öz qeydlərini aparmağa kömək edir. 

Duet AI Google Workspace-in Gmail, Disk, Slaydlar və Sənədlər kimi məşhur xidmətlərinin istifadəsi zamanı istifadəçilərə təklif olunur.

Bu süni intellekt köməkçisi həmçinin istifadəçilərin ehtiyaclarına uyğun olaraq avtomatik cədvəllər yaratmaq, elektron poçtlar yazmaq, məzmunu ümumiləşdirmək və fərdi şəkillər hazırlamaq kimi müxtəlif funksiyaları yerinə yetirə bilir.