İqtisadiyyat.az xarici mediaya istinadla xəbər verir ki, şikayəti təqdim edən müstəqil media qurumları iddia edirlər ki, Google onların xəbərlərindən icazəsiz istifadə edərək istifadəçilərə avtomatik xülasələr təqdim edir.
Media nümayəndələrinin sözlərinə görə, bu xülasələr Google axtarışında əsas nəticələrdə yerləşdirilir və bu, oxucuların birbaşa xəbər saytlarına keçid etməsinin qarşısını alır. Nəticədə isə internet trafikində azalma və gəlir itkisi baş verir.
Şikayətdə bildirilir ki, Google nəinki bu xülasələri təqdim edir, həm də media qurumlarına öz materiallarını süni intellekt sistemlərindən kənarda saxlamaq üçün heç bir seçim təqdim etmir. Şirkətin bazar gücündən sui-istifadə etməsi və rəqabət qaydalarını pozması da əsas arqumentlər sırasındadır.
Google isə məsələ ilə bağlı mövqeyində qeyd edir ki, bu yeniliklər istifadəçilərin axtarış davranışını genişləndirir və nəticədə vebsaytlara əlavə ziyarət axını yaradır. Şirkət trafik itkisi ilə bağlı iddiaların isə çox vaxt natamam və qərəzli məlumatlara əsaslandığını bildirir.
May ayından etibarən bu süni intellekt xülasələrinə reklam yerləşdirilməsi də media nümayəndələrinin narahatlığını artırıb. Məsələ yalnız Avropa ilə məhdudlaşmır – oxşar şikayətlər Böyük Britaniyada və ABŞ-da da gündəmə gəlib.
