İqtisadiyyat.az xəbər verir ki, bu barədə "TechCrunch" portalının "Appfigures" adlı analitik şirkəti məlumat yayıb.

Məlumata görə, Google Play-dəki tətbiqlərin sayı 3,4 milyondan 1,8 milyona düşüb. Bu, tətbiqlərin 47% azaldığını, yəni demək olar ki, yarıya endiyini göstərir.

Kəskin azalma qlobal mobil tətbiq bazarında ümumi tendensiyanı əks etdirmir. "Apple App Store" eyni dövrdə kiçik də olsa artım göstərib – tətbiq sayı 1,6 milyondan 1,64 milyona yüksəlib.

Bununla belə, "Google" ekosistemi üçün bu dəyişikliklər müsbət dəyərləndirilir. İstifadəçilər artıq daha az fırıldaqçılıq sxemləri, spam və keyfiyyətsiz kontentlə qarşılaşırlar – əvvəllər belə tətbiqlər axtarışda yüksək yerlərdə çıxırdı. Vicdanlı proqramçılar isə indi daha ədalətli rəqabət və məhsullarının daha yaxşı görünməsi imkanına sahibdirlər.

İllərdir "Google Play", App Store-dan fərqli olaraq tətbiqlərin yerləşdirilməsində daha yumşaq siyasət yürüdüb. "Google" daha çox avtomatlaşdırılmış yoxlama sistemlərinə və zərərli kodları skan etməyə üstünlük verirdi, bu isə prosesi sürətləndirirdi. Nəticədə mağaza aşağı keyfiyyətli tətbiqlərlə dolmuşdu. "Apple" isə hər zaman əllə aparılan ciddi moderatorluq siyasəti ilə seçilirdi.

Lakin vəziyyət 2024-cü ilin iyulunda dəyişdi. "Google" tətbiqlərin keyfiyyətinə dair minimum tələbləri ciddi şəkildə artırdığını elan etdi. Artıq yalnız işləməyən, yüklənməyən və ya tez-tez donan tətbiqlər deyil, həm də funksionallığı zəif və ya məzmunu minimum olan layihələr də yayımlanmağa buraxılmır.