"Kristall Plus” Qapalı Səhmdar Cəmiyyətinə cərimə yazılıb.

İqtisadiyyat.az xəbər verir ki, QSC barəsində Dövlət Gömrük Komitəsi tərəfindən İnzibati Xətalar Məcəlləsinin 483-cü maddəsinə əsasən cərimə protokolu tərtib olunub.

Həmin maddədə deyilir ki, xarici iqtisadi fəaliyyətin həyata keçirilməsi nəticəsində əldə edilmiş və Azərbaycan Respublikasının müvəkkil olunmuş banklarının hesablarına məcburi qaydada köçürülməli olan az miqdarda xarici valyuta vəsaitlərinin xaricdən qaytarılmamasına görə inzibati xətanın bilavasitə obyekti olan xarici valyutanın dəyərinin otuz faizindən əlli faizinədək məbləğdə cərimə edilir. “Az miqdarda” dedikdə, iyirmi min manatadək olan məbləğ başa düşülür.

İş Xəzər Rayon Məhkəməsində hakim Hüseyn Hüseynlinin sədrliyi ilə araşdırılacaq.

Qeyd edək ki ,"Kristall Plus” Qapalı Səhmdar Cəmiyyətinin əsası 2004-cü ildə qoyulub. QSC şərab istehsalı və satışı ilə məşğuldur.