İctimai nəqliyyatda gediş haqlarının on qəpik bahalaşması cəmiyyətdə əsas müzakirə mövzusudur.

Mövzu ilə bağlı İqtisadiyyat.az-a danışan iqtisadçı-ekspert Xalid Kərimli qeyd edib ki, qiymət artımı bu sahədən də yan keçməyəcəkdi: “Ən son tariflər 5 il bundan əvvəl müəyyənləşmişdi. Sərnişindaşımada əməliyyat xərclərinin əsasını təşkil edən dizelin qiymətinin qalxmasından, işçilik və təmir xərclərinin artmasından sonra daşıyıcı şirkətlər dəfələrlə müraciət edirdilər ki, qiymətlərə yenidən baxılsın. Lakin bu tələb bir neçə dəfə geri qaytarılıb. Ona görə yox ki onlar haqsızdırlar. Məhz sosial təsiri olduğuna görə mümkün qədər təxirə salınırdı”. 

X.Kərimli bu qərarın həm də özəl sektora dəstək məqsədi daşıdığını və labüd olduğunu vurğulayıb: “Dövlət müəssisəsi xərclər artırsa və qiymət artmırsa, dövlətdən əlavə pul tələb edir. Amma özəl sərnişin daşıyıcılarının bu haqqı yoxdur. Sahibkar da baxır ki, "bu gəlir gətirmir, mən niyə, məsələn, yeni avtobus alım?" Qiymətlərin aşağı səviyədə olması bu sahəyə olan marağı aşağı salırdı, zərərlə işləməsinə məcbur edirdi. Dövlət qiyməti artırmamaq üçün çox səy göstərdi, lakin bu olmasaydı nəticədə özəl sərnişindaşıma müflis olub ləğv ediləcəkdi. Daha ciddi problem yaranacaqdı. Ona görə də bu artımın əsası var. Üstəlik Azərbaycanda qiymətlər ən azı MDB ölkələrindəki analoji qiymətlərdən aşağıdı. Bir daha deyirəm, dizelin qiyməti, avtobusların qiyməti, avtobusun təmir xərcləri, işçilərə çəkilən xərclər və.s. bütün bunlar insanların gəlirinə baxmır. Əgər avtobusu istifadə edəcəyiksə ya haqqını verməliyik, ya da istifadə etməyib velosipedlə, araba ilə hərəkət etməliyik. Ona görə də biraz qeyri-populyar qərar olsa da əsaslandırılmışdı və lazımlıdır. Özəl sektoru burada dəstəkləmək lazımdı".