"Fransadan başqa davranış gözləmək sadəlövhlük olar".

Bu sözləri Fransanın Ermənsitana humanitar yardım göstərməsinə münasibət bildirən Azərbaycan Bütövlük Platforması (ABP) sədri Bəhram İsmayıl İqtisadiyyat.az-a açıqlamasında deyib.

Onun sözlərinə görə, Fransa bölgədə varlığını qorumaq və sürdürmək üçün müəyyən yollar axtarır:

"44 günlük savaşda Azərbaycanın Fransa, Rusiya, İran və bir sıra beynəlxalq güclərə rəğmən qazandığı möhtəşəm qələbə dövlətimizin gücünü beynəlxalq arenada kifayət qədər gücləndirməklə yanaşı, bölgədə geopolitik şərtləri də kökündən dəyişdi. Türkiyənin 200 ildən sonra regiona gəlişi, Türkiyə-Azərbaycan tandeminin oturuşması digər gücləri zəiflətdi. ATƏT-in az qala 30 illik "fəaliyyəti"nin faktiki olaraq Azərbaycan tərəfindən sonlandırılması Fransa dövlətinin Qafqazda əl-qolunu təmamilə bağladı. Fransa Qarabağda yaşayan erməni əsilli Azərbaycan vətəndaşlarının "problemlərini" qabartmaq, bu vasitə ilə yenidən bölgəmizə soxulmaq istəyir.

Bu gün Afrikada Rusiyaya, dənizlərdə Türkiyəyə uduzan imperialist Fransa ən azı bizim bölgədə  Türkiyə-Azərbaycan tandeminin qarşısında məğlubiyyətdən qaçmaq istəyir  və göstərdiyi yersiz çabalar da yuxarıda sadaladığımız şərtlərlə bağlıdır. Lakin istər Fransa, istərsə də digər region gücləri Azərbaycanın ərazi bütövlüyünü tanımaq məcburiyyətində qaldıqları kimi, sərhədlərimizin toxunulmazlığını da qəbul edəcəklər. Fransanın Laçın yolu ilə bağlı istəkləri, etik söyləsək, beynəlxaq xuliqanlıqdır, reketlikdir. Heç bir dövlət başqa bir dövlətin dünya tərəfindən tanınan sərhədlərinə müdaxilə edə bilməz. Əlbəttə, öz ambisiyaları və imperial maraqları üçün təkcə Əlcəzairdə bir milyon insanı qətlə yetirən Fransadan başqa davranış gözləmək sadəlövhlük olardı.

Hər kəs, bütün güclər, o cümlədən Fransa istər Azərbaycan xalqının, istərsə də Azərbaycan ordusunun, Ali Baş Komandanın qətiyyətini anlamalıdır. Çox yaxın vaxtda Xankəndində  və yuridiksiyamızda olmayan bəzi ərazilərdə Azərbaycan bayrağının dalğalanacağı heç kimdə şübhə doğurmamalıdır".

Gülşən Şərif