Martın 27-də Ermənistan Milli Assambleyasının sədri Alen Simonyan Fransa Respublikası Milli Assambleyasının Fransa-Ermənistan dostluq qrupunun rəhbəri Ann-Lorens Petelin başçılıq etdiyi nümayəndə heyətini qəbul edib.
İqtisadiyyat.az Ermənistan mətbuatına istinadən xəbər verir ki, görüşün əvvəlində Alen Simonyan fransalı həmkarlarına Ermənistana səfərlərinə görə təşəkkür edib və belə səfərlərin siyasi və təhlükəsizlik baxımından böyük əhəmiyyət kəsb etdiyini qeyd edib.
Ann-Lorens Petel Ermənistanla qurulmuş parlamentlərarası əlaqələri yüksək qiymətləndirib və böyük dostluq qrupuna Ermənistanı dəstəkləməkdə konsensusa malik bütün fraksiyaların nümayəndələrinin daxil olduğunu vurğulayıb.
Tərəflər Ermənistan-Avropa İttifaqı əməkdaşlığına toxunaraq, münasibətlərin müsbət inkişaf dinamikasını vurğulayıblar.
"Ermənistan Aİ-nin müşahidə missiyasının Ermənistan-Azərbaycan sərhədində yerləşdirilməsinə böyük əhəmiyyət verir. Bu, regionda sülhün və təhlükəsizliyin bərqərar olması üçün böyük əhəmiyyət kəsb edir", - deyə MŞ sədri bildirib.
Alen Simonyan fransalı həmkarlarına Cənubi Qafqazda mövcud təhlükəsizlik vəziyyətini, Azərbaycanda saxlanılan erməni hərbi əsirlərin qaytarılması məsələləri barədə məlumat verib.
Ermənistan-Fransa əməkdaşlığının parlamentlərarası, o cümlədən təhlükəsizlik, iqtisadi və digər sahələrdə inkişaf perspektivləri də müzakirə edilib.
Görüşdə Ermənistan-Fransa dostluq qrupunun rəhbəri Vladimir Vardanyan da iştirak edib.
