"Finlandiya Sərhəd Mühafizəsi Rusiya ilə sərhəddəki Vartius keçid məntəqəsini həddindən artıq yükləndiyi üçün müvəqqəti bağlayıb".
İqtisadiyyat.az xəbər verir ki, bu barədə şənbə günü Kainuu bölgəsinə cavabdeh olan sərhəd xidməti məlumat yayıb.
"Vartius keçid məntəqəsi həddən artıq yüklənib. Hazırda biz sərhədi keçmək üçün ondan istifadə etməyi tövsiyə etmirik", - Finlandiya sərhədçiləri bildirib.
Daha sonra Yle televiziya və radio kanalı xəbər yayıb ki, keçid məntəqəsi gün ərzində işini dayandırıb, yerli vaxtla saat 18:19-da Vartius bağlanıb.
Öz növbəsində "İltalehti" qəzeti iddia edib ki, keçid məntəqəsi bazar günü səhər öz işini bərpa edəcək. Sərhəd xidmətləri hələ ki, rəsmi olaraq açılış barədə məlumat verməyib.
Noyabrın 16-da baş nazir Petteri Orpo Finlandiya hökumətinin şənbə günü gecə şərq sərhədindəki dörd sərhəd keçidini bağlayacağını açıqlayıb. Onun sözlərinə görə, hakimiyyət Finlandiyanın şərq sərhədinə son vaxtlar artan "üçüncü ölkə vətəndaşlarının" axınına cavab olaraq belə reaksiya verib.
Rusiya Xarici İşlər Nazirliyinin sözçüsü Mariya Zaxarova isə bildirib ki, Finlandiyanın Rusiya ilə sərhəddəki sərhəd keçidlərini bağlamaq qərarı Avropada yeni ayırıcı xətlər yaradır və Moskvanın bu hərəkətlərə cavabı idarələrarası formatda işlənib hazırlanacaq.
