“Finex Kredit” BOKT 2023-cü ilin maliyyə hesabatını açıqlayıb. 

İqtisadiyyat.az xəbər verir ki, BOKT ötən ili cəmi 4,2 min manat xalis mənfəətlə bitirib. 

Kredit təşkilatı 2022-ci ildə 644,3 min manat xalis zərər açıqlamışdı. 

Hesabat dövründə “Finex Kredit” 920,9 min manat faiz gəliri, 773,3 min manat xalis faiz gəlirləri əldə edib. Kredit zərəri üzrə ehtiyatların yaradılmasından sonra xalis faiz gəliri isə 807,9 min manat təşkil edib ki, bu da əvvəlki ilə nisbətən 8 dəfə çoxdur. Bununla belə, 778,6 min manatlıq inzibati və digər xərclər BOKT gəlirlərinin böyük hissəsini “yeyib”. Nəticədə, vergidən əvvəlki mənfəət 5,2 min manat təşkil edib. 

Beləliklə, “Finex Kredit” ötən il 23,5% kiçilib. 1 yanvar 2024-cü il tarixinə BOKT-nin cəmi aktivləri 3,9 milyon manat təşkil edib ki, bu da 2022-ci ilə nisbətən 1,2 milyon manat azdır.  

Kredit təşkilatının paralel olaraq öhdəlikləri 5,1 milyon manatdan 3,2 milyon manata enib. Ötən il “Finex Kredit”in yığılmış zərəri 752,8 min manat, cəmi kapitalı isə 417,2 min manat təşkil edib. 

Xatırladaq ki, “Finex Kredit” 2013-cü ildə yaradılıb. Onun nizamnamə kapitalı 1 milyon 494 min manatdır.