ABŞ və Qərb ölkələri Qəzzadakı münaqişənin bölgədə müharibəyə çevrilməsinin qarşısını alaraq İsraili dayandırmalıdır. 

İqtisadiyyat.az xəbər verir ki, bunu Qətərdə səfərdə olan Türkiyənin xarici işlər naziri Hakan Fidan əmirliyin rəsmiləri və HƏMAS hərəkatının Siyasi Bürosunun rəhbəri İsmayıl Haniyə ilə danışıqlarından sonra deyib.

"Biz əvvəlcə münaqişənin bölgəyə sıçrama riskindən danışdıq, regional müharibə riski var, bəllidir ki, İsrailin baş naziri Binyamin Netanyahu hakimiyyətdə qalmaq üçün bölgəmizi daha böyük fəlakətlərə sürükləməyə çalışır. Biz istəmirik ki, üçüncü ölkələr bu regionda münaqişələrə səbəb olsunlar, ABŞ və Qərb ölkələri İsraili dayandırmalı və münaqişənin yayılmasının qarşısını almalıdırlar", - Fidan bildirib. 

Türkiyənin xarici işlər naziri Qəzzada Fələstin-İsrail münaqişəsinin həlli üçün zəmin yarada biləcək atəşkəsin vacibliyinə də diqqət çəkib.