"Mitsubishi"nin Azərbaycandakı rəsmi dileri olan "Diamond Motors" MMC-də nöqsanlar aşkarlanıb.
İqtisadiyyat.az xəbər verir ki, Fövqəladə Hallar Nazirliyinin (FHN) Dövlət Yanğın Nəzarəti Xidmətinin MMC-də apardığı monitorinq zamanı yanğın təhlükəsizliyi qaydalarının pozulduğu və ya yerinə yetirilmədiyi məlum olub.
Buna görə də MMC-yə qarşı İnzibati Xətalar Məcəlləsinin 518.1-ci maddəsinə əsasən cərimə protokolu tərtib edilib. Daha sonra protokol baxılması üçün Abşeron Rayon Məhkəməsinə göndərilib.
Protokol hakim Şəfəq Məmmədovanın sədrliyi ilə araşdırılacaq.
Protokol tərtib olunan maddədə deyilir ki, yanğın təhlükəsizliyi standartlarının, normalarının və qaydalarının tələblərinin pozulmasına və ya yerinə yetirilməməsinə görə fiziki şəxslərə xəbərdarlıq edilir və ya onlar iyirmi manatdan otuz manatadək məbləğdə cərimə edilir, vəzifəli şəxslərə xəbərdarlıq edilir və ya onlar yüz manatdan yüz əlli manatadək məbləğdə, hüquqi şəxslər üç yüz əlli manatdan beş yüz manatadək məbləğdə cərimə edilir.
Qeyd edək ki,"Diamond Motors" MMC 2006-cı ildən Azərbaycanda "Mitsubishi Motors" şirkətinin rəsmi dileridir.
