“İşğaldan azad edilmiş ərazilərimizdə olan yataqları Ermənistan tərəfi saxta şirkətlər yaratmaqla 30 ilə yaxın talan edib. Söyüdlü, Kəlbəcərdə və Zəngilanda olan qızıl yataqları var ki, birbaşa İsveçrəyə satılıb. Hansı ki, yüksək keyfiyyətli qızıllar olub. Hesablamaqla bitməz, Azərbaycan sərvətləri həddindən çox talanıb. Hətta 2020-ci ildə zavodun açılması planlaşdırılırdı, amma Azərbaycan Ordusu buna imkan vermədi”.

İqtisadiyyat.az bildirir ki, bunu saytımıza açıqlamasında iqtisadçı Eldəniz Əmirov deyib:

"Ermənistan həmin yataqlardan nə qədər gəlir əldə edibsə, Azərbaycan iki qat zərər görüb. Çünki istismar qeyri-adekvat, kor-koranə olub. Bir var yataqlarda normal hasilat sənayesinin tələblərinə uyğun iş gedə, bir də var həqiqi mənada istismar. Qısa müddət ərzində maksimum fayda götürməyə çalışıblar. Ərazilərimiz 30 il ərzində məhz bu cür istismar olunub".

İqtisadçı həmçinin qeyd edib ki, həmin ərazidə yerləşən yataqlarla bağlı dəqiq rəqəmlər söyləmək mümkün deyil:

“Ərazilərdəki qızıl yataqları ilə bağlı konkret nəsə demək çox çətindir. Bir var ehtiyatları hesablanan və Ehtiyatlar Agentliyinin balansına daxil olan yataqlar. Birdə var, ümumiyyətlə hələ qiymətləndirilməmiş, kəşfiyyatına ehtiyac olan yataqlar. 

Konkret olaraq qiymətləndirilmiş və Ehtiyatlar Agentliyinin balansına daxil edilmiş yataqların sayı 143, bəzən isə bu rəqəmin 150-160 olduğu qeyd edilir. Mən hesab edirəm ki, bu rəqəm mövcud potensialın heç yarısı qədər də deyil. Araşdırmaların və qiymətləndirmələrin aparılmasına ehtiyac var. Getdikcə texnologiya inkişaf edir, buna görə də, yeni yataqların kəşf edilməsi ehtimalı daha çox olur”.