Rəsmi İrəvan sözdə sülh tərəfdarı olduğunu bəyan etsə də, bu istiqamətdə praktiki addımlar atmır.
Bunu İqtisadiyyat.az-a açıqlamasında Milli Məclisin deputatı Samir Vəliyev deyib.
Deputat bildirib ki, yanvarın 7-də Azərbaycan Prezidenti İlham Əliyev yerli televiziya kanallarına müsahibəsində sülh prosesi ilə bağlı mövcud mənzərəni şərh edib, dövlətimizin mövqeyini bir daha diqqətə çatdırıb.
“Bundan sonra Ermənistanın baş naziri sülh üçün hansısa “təkliflərlə” çıxış etdi. Əslində, bütün bunlar erməni tərəfinin bu mövzuda spekulyasiyanı davam etdirməsidir. İlk növbədə, Ermənistan ölkəmizə qarşı ərazi iddialarına son qoymalıdır. Çünki bu ölkənin konstitusiyasında və digər hüquqi sənədlərdə ölkəmizə qarşı ərazi iddiaları hələ də qüvvədə qalır. Azərbaycan rəsmi səviyyədə bununla bağlı dəfələrlə rəsmi xəbərdarlıq edib”.
Deputat qeyd edib ki, digər tərəfdən, erməni tərəfinin ATƏT-in Minsk qrupunun ləğvi ilə bağlı ortya qoyduğu son yanaşma da suallar doğurur:
“Əvvəllər İrəvan bununla bağlı şərtlər irəli sürürdü. Paşinyanla deyirdi ki, sülh müqaviləsi imzalayaq, sonra Minsk qrupu ləğv olunsun. Amma Minsk qrupunun ləğvi üçün heç bir şərt ola bilməz. Çünki faktiki olaraq 44 günlük Vətən müharibəsindən sonra belə bir təsisat fəaliyyət göstərmir. ATƏT-in Minsk qrupu üzərinə düşən vəzifəni yerinə yetirə bilmədi. Minsk qrupu ona verilmiş mandat əsasında münaqişənin həllinə nail olmadı. Minsk qrupu həmsədr ölklərinin liderləri münaqişənin hərbi həlli olmadığını iddia etsə də, Azərbaycan bunu hərbi-siyasi vasitələrlə etdi. Prezident İlham Əliyevin qeyd etdiyi kimi, “Hərbi variant yoxdur” deyənlər sadəcə, mövcud vəziyyəti olduğu kimi saxlamaq istəyirdilər. Ancaq status-kvo güc yolu ilə, Azərbaycan dövlətinin iradəsi, yürüdülən müdrik siyasət, Azərbaycan xalqının əzmi, həmrəyliyi, bütün qüvvələrin səfərbər olunması, Azərbaycan əsgərinin şücaəti sayəsində dəyişdirildi.
Minsk qrupunun həmsədrləri BMT Təhlükəsizlik Şurasının daimi üzvü olsalar da, Ermənistan qoşunlarının çıxarılmasını tələb edən 4 qətnamənin icrası üçün heç nə etməyiblər. Beynəlxalq vasitəçi olan ölkələrin hər biri öz imkanlarından, potensialından istifadə edərək Ermənistanı işğal etdiyi əraziləri tərk etməsi üçün mesaj verə bilərdi, lakin belə mesaj verilməyib. Həmsədr dövlətlərin işğalçı Ermənistana ciddi təsir etmək imkanları var idi. Müəyyən sanksiyalar tətbiq olunsaydı, işğalçı qüvvələr geri çəkilməyə məcbur olardı. Amma bunu etməyiblər. Həmsədrlər vaxtaşırı bölgəyə səfər etməkdən, müəyyən ideyalarla çıxış etməkdən, bir birinin təkrarı olan bəyanatlar səsləndirçəkdən başqa heç bir iş görməyiblər. Ona görə də, Azərbaycan xalqı haqlı olaraq Minsk qrupunun fəaliyyətindən həmişə narazı olub. Artıq bu məsələlər geridə qalıb. Çünki Azərbaycan dövləti öz ərazi bütövlüyünü və suverenliyini bərpa edib. Belə olan halda, Ermənistanın Minsk qrupu lə bağlı hansısa spekulyası qəbulolunmazdır.
Paşinyanın Minsk qrupu ilə bağlı yeni fikrinə gəlincə, Ermənistan mətbuatının bu barədə yazdıqları həqiqətən ola bilər. Mümkündür ki, Paşinyan hökuməti bu il Minsk qrupunun ləğv olunması üçün Bakı ilə birgə müraciət etsin. Təbii ki, bunu xoşluqla etməyəcək. Erməni tərəfi Azərbaycanın haqlı tələbləri əsasında buna getmək məcburiyyətindədir.
Diqqət yetirək, 44 günlük müharibədən bir müddət sonra Qarabağı Azərbaycanın tərkib hissəsi kimi tanımağa məcbur oldular. Qazaxın 4 kəndini geri qaytardılar. Hansı ki, bu addımlara getmək istəmirdilər, lakin Azərbaycanın gücü, Prezidentimizin qətiyyəti, dəmir yumruğu qarşısında buna getməyə məcbur oldular. Bu məntiqlə Minsk qrupu haqqında da belə addım atmaları istisna deyil”.