“Azərbaycan Vətən müharibəsindəki tarixi Zəfəri və antiterror tədbirləri ilə separatizmə sarsıdıcı və birdəfəlik zərbə vurmaqla yeni bir reallıq yaratdı və bu reallıq artıq bütün dünya tərəfindən qəbul olunur”.
Bunu İqtisadiyyat.az-a açıqlamasında Milli Məclisin deputatı Sevinc Hüseynova deyib.
Deputat bildirib ki, Azərbaycan hər zaman sülhün tərəfdarı olub: “İkinci Qarabağ müharibəsindən sonra Azərbaycan regionda sülhün təmin olunması istiqamətində lazımi tədbirlər görür və təşəbbüslərlə çıxış edir. Azərbaycanın bu təşəbbüsləri beynəlxalq ictimaiyyət tərəfindən də dəstəklənir. Təəssüflər olsun ki, Ermənistan hər zaman olduğu kimi spekulativ addımlar atmaqla regionda sülh prosesini ləngidir. Ermənistan Azərbaycan ərazilərini 30 ilə yaxın işğalda saxladığı dövrdə olduğu kimi müharibədən sonrakı dövrdə də havadarlarının təhriki ilə sürətlə silahlanır, sülh prosesini uzadır. Belə ki, rəsmi İrəvan müəyyən beynəlxalq dairələrlə birlikdə sülh məsələsi ətrafında spekulyasiya ilə məşğul olur”.
S.Hüseynova söyləyib ki, Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə müraciətində bir daha Ermənistana və onun havadarlarına xəbərdarlıq etdi:
“Dövlət başçısı Ermənistanın genişmiqyaslı və sürətli silahlanması, öldürücü silahların tədarükünə diqqət çəkərək bildirdi ki, bu, sülhü, mümkün olan sülhü poza bilər. “Ona görə bir daha özümə borc bilib Ermənistan rəhbərliyinə növbəti xəbərdarlıq edirəm ki, bu təhlükəli yoldan çəkinsinlər” deməklə cənab Prezident Azərbaycanın qətiyyətli mövqeyini bir daha ortaya qoydu”.
“Hesab edirəm ki, Ermənistan və havadarları bu xəbərdarlıqdan nəticə çıxarmalı və öz çirkin əməllərindən əl çəkməlidirlər. Vətən müharibəsində Azərbaycanın qüdrəti bütün dünyaya aydın şəkildə nümayiş olundu. Azərbaycan müharibədən sonrakı dövrdə də ordunun gücləndirilməsi istiqamətində davamlı olaraq kifayət qədər mühüm tədbirlər həyata keçirir. Hər hansı bir təxribata yol verilərsə, Ermənistan daha ağır zərbə alacaq. Bu baxımdan Ermənistanın Azərbaycanla münasibətləri normallaşdırmaqdan başqa cıxış yolu yoxdur. Ermənistanın hazırki ağır sosial-iqtisadi və siyasi durumunu nəzərə alsaq, bu gün regionda sülhün bərqərar olması Azərbaycandan çox Ermənistana lazımdır”, - deyə deputat əlavə edib.