"Rusiyasız razılaşmanın davam edə biləcəyinə şübhəmiz var. Səylərimiz mövcud taxıl dəhlizinin aktiv şəkildə yenidən fəaliyyət göstərməsinə hesablanıb".

İqtisadiyyat.az xəbər verir ki, bunu Türkiyə Prezidenti Rəcəb Tayyib Ərdoğanın baş müşaviri, səfir Akif Çağatay Kılıç NTV-nin canlı yayımında qonaq olarkən bildirib.

"Qara dəniz taxıl dəhlizinin yenidən işə salınması ehtimalı varmı?" sualına Kılıç belə cavab verib: "Prezident Rəcəb Tayyib Ərdoğanın xüsusi əhəmiyyət verdiyi və şəxsən izlədiyi taxıl dəhlizi təxminən bir ildir ki, fəaliyyətdədir".

Hazırda baş verənləri "durğunluq dövrü" adlandıra biləcəyini qeyd edən Kılıç, "Rusiya tərəfi geri çəkildiyini bəyan etsə də, gözlədiyi kimi müəyyən şərtlər yerinə yetirilərsə, saziş davam edə bilər. Həm BMT, həm də Ukrayna rəsmiləri hələ də İstanbuldakı mərkəzdədir. İşimiz davam edir", - deyə əlavə edib.

"Hazırda heç bir alternativ, başqa element, yol düşünmürük. Rusiyasız buradakı razılaşmanın davam edəcəyinə şübhələrimiz var. Ona görə də, səylərimiz mövcud taxıl dəhlizinin yenidən aktiv işləməsinə hesablanıb", - diplomat vurğulayıb. 

Kılıç xarici işlər naziri Hakan Fidanın Rusiyaya səfər edəcəyini, səfərin əsas mövzularından birinin taxıl dəhlizi olacağını da bildirib.