"Türkiyə istər coğrafi mövqeyi, istər mədəni əlaqələri, istərsə də beynəlxalq əlaqələri baxımından böhranlardan ən çox təsirlənən ölkələrdən biridir".

İqtisadiyyat.az xəbər verir ki, bunu Türkiyə Prezidenti Rəcəb Tayyib Ərdoğan Antalya Diplomatiya Forumunun rəsmi açılış mərasimində çıxışı zamanı deyib.

"Bəşəriyyətin gündəmini zəbt edən münaqişələrin, gərginliklərin, müharibələrin və risklərin böyük əksəriyyəti bizim yaxın coğrafiyamızda yaşanır. Məsələn, bir çox ölkənin son 5-10 ildə üzləşdiyi terror təhlükəsinə qarşı 40 ildir mübarizə aparırıq. Artıq 12 ildir ki, qeyri-qanuni miqrasiya məsələsi ilə bağlı ciddi təzyiqlərə məruz qalmışıq. Münaqişələrdən və terror təşkilatlarının zülmündən qaçan 4 milyona yaxın qaçqını qəbul etmişik.

Bəşəriyyətin üzləşdiyi digər mühüm problem olan iqlim dəyişikliyində də vəziyyət fərqli deyil. Aralıq dənizi hövzəsində olduğumuz üçün iqlim dəyişikliyinin mənfi təsirlərinə hər il daha çox məruz qalırıq.

Türkiyənin hər hansı hadisəni uzaqdan izləmək və ya görməməzlikdən gəlmək kimi bir şansı yoxdur. Qarşılaşdığımız geosiyasi riskləri idarə etmək üçün əvvəlkindən daha fəal, çoxşaxəli, diqqətli və sakit siyasət yürüdürük", - deyə o bildirib.

Gözəl Həşimova