Türkiyə prezidenti Rəcəb Tayyib Ərdoğan ölkəsinin strateji məqsədinin Avropa İttifaqına (Aİ) tamhüquqlu üzv olmaq olduğunu bildirib. 

İqtisadiyyat.az xəbər verir ki, Ərdoğan bunu Ankarada Estoniya prezidenti Alar Karislə keçirdiyi mətbuat konfransında deyib. 

"Avropa İttifaqına tam üzv olmaq bizim strateji hədəfimizdir. Aİ-nin Türkiyəyə eyni mövqedən yanaşması bizim ümumi maraqlarımıza uyğundur ki, bu kontekstdə Estoniyanın Türkiyəyə dəstəyi bundan sonra da güclənəcək. Bunlarla bağlı mən cənab Karisə gözləntilərimi söylədim", - deyə Ərdoğan bildirib. 

Yaxın Şərqdəki vəziyyətdən danışan Türkiyə lideri qeyd edib ki, İsrailin Qəzza zolağında törətdiyi qətliam beynəlxalq ictimaiyyətin daimi atəşkəs çağırışlarına baxmayaraq, təkcə regional sabitliyi deyil, həm də qlobal təhlükəsizliyi təhdid edir: "Qəzzada bu vəhşiliyə görə məsuliyyət daşıyanlar gec-tez beynəlxalq hüquq çərçivəsində cavab verəcəklər. Qəzzada bu humanitar fəlakətə son qoymaq üçün təcili atəşkəsə nail olmaq və humanitar yardımların çatdırılmasını təmin etmək lazımdır".

Ərdoğan əlavə edib ki, Yaxın Şərqdə davamlı sülh iki dövlətli həllin həyata keçirilməsi ilə mümkündür və beynəlxalq ictimaiyyət bu məsələ ilə bağlı öz fikrini bildirməlidir.