Azərbaycanda yaradılmasına başlanılan Elektron Rəqabət İnformasiya Sisteminin (ERİS) üstünlükləri açıqlanıb.

"Azərbaycan İnformasiya və Kommunikasiya Texnologiyaları Sənayesi Assosiasiyası" İctimai Birliyinin İdarə Heyətinin sədri, İKT üzrə ekspert Elvin Abbasov İqtisadiyyat.az-a bildirib ki, ERİS-in bir çox üstünlükləri mövcuddur.

Mütəxəssisin sözlərinə görə, ERİS özlüyündə istehlakçıların və biznes subyektlərinin rəqabət mühitinin şəffaflaşmasını, habelə istehlakçıların şikayətlərinin səliqəli formada elektron mühitdə cavablandırılmasını, nəzarət mexanizmi ilə cavabların geri göndərilməsini və onların arxivləşdirilməsini, eləcə də onların elektron mühitdə saxlanılmasını, həmçinin biznes subyektlərinin və istehlakçıların hüquqlarının qorunmasını təmin edəcək:

"Biznes subyektlərinin hər hansı müraciətlərində onlardan istənilən digər qurumlara aid sənədlərin, ərizə və ya arayışların onlayn formada inteqrasiyası da burada nəzərədə tutulub. Bu o deməkdir ki, əgər biznes subyektindən vergiyə, məhkumluğa və yaxud digər məsələlərlə bağlı hər hansı arayış və ya sertifikatlar istənilərsə, bunların aidiyyatı qurumlardan birbaşa onlayn rejimdə həmin sistemdə öz əksini tapması mümkün olacaq. ERİS həmçinin ölkədə rəqəmsallaşma mühitinə böyük bir qatqısı olacaq elektron informasiya sistemdir. Burada məlumatlar toplandıqdan sonra şikayətlər haqqında, hesabatlılıqlar, statistikaların formalaşması, subyektlərin rəqabət mühiti və istehlakçıların hüquqlarının qorunmasındakı şəffaflığı təmin edəcək bir informasiya sistemi nəzərdə tutulub".

Qeyd edək ki, Prezident İlham Əliyevin ötən gün imzaladığı Fərmana əsasən, Elektron Rəqabət İnformasiya Sistemi yaradılır. 

Fərmanla müəyyən edilib ki, ERİS rəqabət və istehlakçıların hüquqlarının müdafiəsi sahələrində istehlakçıların və bazar subyektlərinin müraciətlərinin (vəsatətlərinin) qəbulunu, emalını, onlara əlavə edilməli olan sənədlərin və ya məlumatların real vaxt rejimində digər dövlət orqanlarından (qurumlarından) sorğu əsasında əldə olunmasını, həmin müraciətlərə (vəsatətlərə) dair qərarların və məlumatların elektron qaydada təqdim edilməsini, habelə qeyd olunan sahələrdə məlumatların istifadəçilər üçün əlçatanlığını təmin edəcək. ERİS-in sahibi funksiyalarını İqtisadiyyat Nazirliyi, operatoru funksiyalarını Antiinhisar və İstehlak Bazarına Nəzarət Dövlət Xidməti həyata keçirəcək. İqtisadiyyat Nazirliyi altı ay müddətində ERİS-in formalaşdırılmasını təmin edəcək.

Sadiq Cavadov