ABŞ-nin Energetika Nazirliyi yanında Energetika İnformasiyası Administrasiyası (EIA) Azərbaycanda 2024-2025-ci illər üçün gündəlik neft və digər maye karbohidrogenlərin hasilatı üzrə proqnozu açıqlayıb.

İqtisadiyyat.az xəbər verir ki, bu barədə EIA-nın aylıq hesabatında deyilir.

Məlumata görə, bu il Azərbaycanda gündəlik neft və digər maye karbohidrogenlərin hasilatının 600 min barel olacağı proqnozlaşdırılır. Bu da əvvəlki proqnozla müqayisədə 10 min barel azdır. Bu ilin üçüncü rübündə ölkədə gündəlik neft və digər maye karbohidrogenlərin hasilatının 600 min barel, dördüncü rübdə isə 610 min barel olacağı proqnozlaşdırılır.

Qurum, gələn il ölkədə ortalama gündəlik neft hasilatının 640 min barel olacağını gözləyir ki, bu da əvvəlki proqnozla müqayisədə 10 min barel azdır. Hesabatda gələn ilin birinci rübündə Azərbaycanda gündəlik neft və digər maye karbohidrogenlərin hasilatının 620 min barel, ikinci rübdə 640 min barel, üçüncü və dördüncü rübdə isə 660 min barel olacağı proqnoz edilir.

Qeyd olunur ki, ötən il Azərbaycanda gündəlik neft və digər maye karbohidrogenlərin hasilatı 620 min barel təşkil edib.

 Gözəl Həşimova