“Hamımızı narahat edən məsələlərdən biri də son illərdə nikahın pozulması hallarının artmasıdır. Aliment və ailə mübahisələrinin artması çoxlu sayda məhkəmə qətnamələrinin və icra sənədlərinin ortaya çıxmasına səbəb olur”. 

İqtisadiyyat.az xəbər verir ki, bunu Milli Məclisin Ailə, qadın və uşaq məsələləri komitəsinin təşkil etdiyi “Konstitusiya və Suverenlik İli” çərçivəsində “Ailə, qadın və uşaq hüquqları – konstitusion hüquqların əsas prioriteti kimi” mövzusunda ictimai dinləmədə ədliyyə nazirinin müavini Abiddin Hüseynov deyib. 

O bildirib ki, Ədliyyə Nazirliyi icra qurumlarının artan iş yükü fonunda daha effektiv çalışmaq üçün bütün mümkün vasitələrdən istifadə edir:

“Amma hesab edirik ki, Ədliyyə Nazirliyi tək bu məsələnin öhdəsindən gəlməkdə müəyyən çətinlik çəkir. Məhkəmə qərarlarının artan tendensiyası göstərir ki, bu, daha çox sayda məhkəmə qərarlarının qəbul etmək və icrası ilə problem həll olunmur. Bir cəmiyyətdə artıq Ali Məhkəməyə qədər gedən məhkəmə aktları və qərarları mübahisə olunur, bəzən insanların bir-biri ilə prinsip apararaq yuxarı instansiya məhkəmələrinə şikayət etməsi məhkəmələrin iş yükünu artırır. Bəzən görürsən ki, bir nikahın pozulması faktı özlüyündə bir neçə mübahisəni ortaya çıxarır. Bir nikahın pozulmasından yeni aliment mübahisəsi, əmlak bölgüsü və uşaqla ünsiyyət mübahisəsi ortaya çıxır".