"Təşviq siyasəti aparılan zamandan sosial daxilolmalarda son 6 ildə 2.5 dəfə artım müşahidə olunub və hazırda bu daxilolmaların həcmi 5.7 milyard manatdan çoxdur. Bunun nəticəsində dövlətin sosial sığorta fondunun büdcənin transferlərindən asılılığı 2018-ci ildəki 35.6 faizdən azalaraq bu gün 17.5 faiz təşkil edir".
İqtisadiyyat.az xəbər verir ki, bu sözləri “Vergi Xidməti – 25: Davamlı inkişaf və effektiv transformasiya” Forumunda çıxış edən İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli deyib.
Onun sözlərinə görə, önəmli göstəricilərdən bir idə işəgötürənlərin sayının artım göstəricidir: "Bu gün ölkədə 120 mindən çox hüquqi şəxs fəaliyyət göstərir ki, bu da vergi ödəyicilərinin sabit inkişafda olan hissəsini ifadə edir".
DVX rəisi bildirib ki, son bir neçə ildə ölkədə 100 mindən artıq elektron kassa quraşdırılıb və bu kassalar üzrə 2024-cü ildə dövriyyə 24.5 milyard manatdan çox olub: "Yeni nəsil kassa aparatları və ictimai nəzarəti təmin edən “ƏDV geri al” layihəsi hesabına dövriyyənin artımı sürətlənib. Bu, xüsusilə ticarət sektorunda müşahidə olunur. Beləliklə, ümumiləşdirsək qeyd etmək istərdim ki, vergi siyasətində bu yanaşmalar hədəflərlə nəticə baxımından öz məqsədlərinə çatıb, kölgə iqtisadiyyatı ilə bağlı müəyyən leqallaşmaya nail olunub və bu vergi alətlərinin iqtisadi hədəflərə çatmaq üçün nə dərəcədə effektli olmasının bir nümunəsidir".
O.Nəzərli çıxışı zamanı vergi sistemi qarşısında duran strateji hədəflər və yeni iqtisadi inkişaf modelində vergilərin rolu barədə də fikirlərini bölüşüb. O qeyd edib ki, ötən il vergi sistemi üçün beynəlxalq nüfuzun artması baxımından da əlamətdar il olub: "Avropadaxili Vergi Administrasiyaları Təşkilatına (IOTA) prezidentliyin Azərbaycana həvalə olunması ölkəmizin vergi sisteminin beynəlxalq aləmdə də tənzimləyici rola malik olmasını sübut edir. Hazırda beynəlxalq təşkilatın fəaliyyətini təkmilləşdirmək üçün öz töhfələrimizi veririk. Daha bir uğurumuz İqtisadi Əməkdaşlıq və İnkişaf Təşkilatı (İƏİT) tərəfindən yaradılmış “Vergi məqsədləri üçün şəffaflıq və məlumat mübadiləsi üzrə Qlobal Forum”un ölkəmizin şəffaflıq və məlumat mübadiləsi üzrə beynəlxalq standartların tətbiqi və qiymətləndirməsi üzrə ən yüksək reytinqdə dəyərləndirməsi olub. Ölkəmizin bu reytinqi qazanması vergi sistemində aparılan islahatların beynəlxalq müstəvidə də yüksək qiymətləndirldiyini və davamlı vergi sisteminin bərqərar olduğunu bir daha təsdiqləyir".
DVX rəisi vurğulayıb ki, əsas strateji hədəf vergi idarəçiliyində şəffaflığı, ədalətliliyi və effektivliyi artırmaqdır: "Bunu isə rəqəmsal texnologiyaların və innovasiyaların tətbiqi ilə təmin edirik. Vergi ödəyiciləri ilə qarşılıqlı münasibətləri daha da asanlaşdırmaq, vergi yığımı proseslərini sürətləndirmək və vergilərin doğru və vaxtında ödənilməsini təmin etmək əsas məqsədlərimizdəndir. Dövlət Vergi Xidmətinin 2025-2028-ci illər üzrə strategiyası hazırlanıb. Bu strategiya bizim yaxın gələcəkdə missiyamızı, dəyərlərimizi, gələcəyə baxışımızı və strateji fəaliyyət istiqamətlərimizi müəyyən edir. Peşəkarlıq, innovativlik, təşəbbüskarlıq və əməkdaşlıq kimi dəyərlərə söykənərək Dövlət Vergi Xidməti innovativ xidmətlərlə etibarlı tərəfdaş olmağı hədəfləyir".
Elçin Mehdiyev
