“Son üç ildir keçirilən vergi mühasibatlıq zirvəsi xüsusi bir əhəmiyyət kəsb edir. Çünki bu, müasir iş dünyasında maliyyə sisteminin düzgün təşkilinin, mühasibatlığın və vergi savadlılığının necə mühüm bir yer tutduğunu müzakirə etmək üçün gözəl bir fürsətdir”.

İqtisadiyyat.az xəbər verir ki, bunu Dövlət Vergi Xidmətinin Vergi siyasəti baş idarəsinin rəisi Nicat İmanov ölkənin aparıcı maliyyə və biznes platformalarından biri olan “Vergi və Mühasibatlıq Zirvəsi 2025”də (VMZ2025) deyib.

Onun sözlərinə görə, dövlət-özəl əməkdaşlığı xüsusən də vergi tənzimlənməsi ilə bağlı aparılan islahatlar çərçivəsində hər zaman özünün böyük əhəmiyyətini göstərib:

“Bu kimi platformaların yaratdığı imkanlardan maksimal şəkildə faydalanaraq, ölkəmizin və özəl sektorun yanaşmalarındakı ortaq nöqtələri taparaq irəliyə doğru addımlamalıyıq. Bu günlərdə Dövlət Vergi Xidmətinin 25 illik yubileyini qeyd etdik. Bu, bizim üçün bir hesabat mərhələsi idi və fürsətdən istifadə edərək bildirmək istərdim ki, bu müddət ərzində vergi xidmətinin, iqtisadiyyatda şəffaflığın təmin edilməsi istiqamətindəki əhəmiyyətli addımları nəzərə alaraq yeni dönəmdə fəaliyyətimizi daha iddialı və hədəf yönümlü istiqamətdə davam etdirmək niyyətindəyik”.

İsmayıl Bakuvi