Çinin ən böyük banklarından biri olan "Bank of China"nın keçmiş rəhbəri Liu Lianqe korrupsiya və qanunsuz kreditlərin verilməsi ittihamları ilə ölüm cəzasına məhkum edilib.
İqtisadiyyat.az-ın məlumatına görə, o, təxminən 121 milyon yuan (28,5 milyon AZN) məbləğində rüşvət almaqda ittiham olunub. Bununla yanaşı, hökmün icrası iki il müddətinə təxirə salınıb və bildirilib ki, Liu cəzanın icrasından qaça bilər.
Ömürlük həbs yalnız bir şərtlə tətbiq edilə bilər
Məlumatda qeyd olunur ki, əgər Liu iki illik təxirə salma müddətində başqa cinayət törətməzsə, ölüm hökmü ömürlük həbs cəzası ilə əvəz olunacaq. Bundan əlavə, bankın keçmiş idarə heyəti sədri bütün siyasi hüquqlardan məhrum edilib və qanunsuz əldə edilmiş aktivlər də daxil olmaqla bütün əmlakı müsadirə edilib.
Cinayət işinə dair hökm rəsmi şəkildə elan edilib
26 noyabrda Şandun əyalətinin Cinan şəhərindəki Orta Xalq Məhkəməsi keçmiş bank rəhbərinə hökm oxuyub. Ölüm hökmü ilə yanaşı, Liu qanunsuz şəkildə 3,3 milyard yuan həcmində kreditlərin verilməsinə yardım etdiyi üçün 10 il həbs cəzası və 150 min yuan cərimə ilə də cəzalandırılıb.
63 yaşlı Liu 2019-cu ildə "Bank of China"nın sədri təyin edilib. Bundan əvvəl o, Çin Xalq Bankı və Çin İxrac-İdxal Bankı daxil olmaqla bir çox maliyyə qurumlarında çalışıb.
Liu Lianqe işi maliyyə sektoruna qarşı korrupsiya ilə mübarizə kampaniyasının bir hissəsidir
Liu 2023-cü ilin oktyabr ayında həbs olunub. Ona qarşı şübhələr ilk dəfə mart ayında ÇXR-nin Mərkəzi Disiplin Nəzarəti Komissiyasının (CCDI) ciddi qanun pozuntularına dair bəyanatından sonra yaranıb.
Bu ittiham Çinin maliyyə sektorunda genişmiqyaslı antikorrupsiya yoxlamaları dalğasına yol açıb. CCDI-nin məlumatına görə, ölkənin 30-dan çox iri dövlət şirkəti təhqiqat obyektinə çevrilib.
Çinin antikorrupsiya kampaniyası nə ilə diqqət çəkir?
2023-cü ilin yazında Çinin maliyyə sektorundakı korrupsiya hallarına qarşı mübarizəsi genişlənib. Hakimiyyət orqanları sektorun real iqtisadiyyata xidmət etməkdə aciz olduğunu bildirib və yoxlamaların gücləndiriləcəyini açıqlayıb. CCDI maliyyə liderlərini hüquqi normalara riayət etməyə və özünə nəzarəti gücləndirməyə çağırıb.
Liu Çində maliyyə sektorundakı korrupsiyaya qarşı mübarizə çərçivəsində məhkəmə qarşısına çıxan ən yüksək səviyyəli bankirlərdən biri olub. Bu kampaniya Çin Xalq Respublikasının sədri Si Cinpinin 2021-ci ilin sonlarında başladığı təşəbbüslərdən biridir.
Davud Hüseynli
