Ötən il dünyada qaçqınların sayı illik müqayisədə 108,4 milyondan 117,3 milyona yüksəlib ki, bu da rekord səviyyə hesab olunur.

İqtisadiyyat.az xəbər verir ki,  bu barədə Birləşmiş Millətlər Təşkilatının Qaçqınlar üzrə Ali Komissarlığının (UNHCR) əməliyyat məlumatlarında deyilir.

Məlumata görə, hər dəqiqədə 20 nəfər müharibə və ya təqib səbəbindən evlərini tərk edir. Dünyada bu göstərici bu ilin may ayına qədər 120 milyon nəfərə çatıb. Evlərini tərk edənlərin əksəriyyəti (68,3 milyon) məcburi köçkünlərdir.

2023-cü ildə qaçqın və köçkünlərin sayının artmasına ən çox töhfə verənlər Sudan, Konqo Demokratik Respublikası, Myanma və Qəzza zolağındakı münaqişələr olub. Bildirilib ki, dünyada qaçqınların təxminən dörddə üçü (73%) bu beş ölkədəndir: Əfqanıstan, Suriya, Venesuela, Ukrayna və Cənubi Sudan.

Ən çox qaçqın qəbul edən ölkələr arasında İran, Türkiyə, Kolumbiya, Almaniya və Pakistan liderlik edir.

 

Gözəl Həşimova